ئەم دانیشتنە کە ڕۆژانی ٢٩ و ٣٠ی مانگی نوامبر بەڕێوەچوو، بەشێک بوو لە هەوڵە بەردەوامەکانی کۆمەڵەی زەحمەتکێشان بۆ بەشداری چالاکانە لە دیالۆگەکانی جیهانی سەبارەت بە دیموکراسی، دادپەروەری کۆمەڵایەتی و ئاشتی. لەم کۆبوونەوەدا سەرکردەکانی پارتە سۆسیالیستی و پێشکەوتنخوازەکان لە سەرانسەری جیهان بە میوانداری و وتەکانی پارتی کرێکارانی ماڵتا بەڕێوەچوو. لە گفتوگۆ سەرەکییەکان دا تیشک خرایە سەر بەرەنگاربوونەوەی سەرهەڵدانی ڕاستڕەوی توندڕەو، پێویستی هاوکاریی فرەلایەنە بۆ دەستەبەرکردنی ئاشتی، گرنگی دادپەروەری کۆمەڵایەتی، یەکسانی ڕەگەزی و لەگەڵ جەماوەر بوون.
لەو چوارچێوەیەشدا کۆمەڵەی زەحمەتکێشانی کوردستان بوونی خۆی لەسەر بنەمای باس کردنی وردی بارودۆخی سیاسی، کۆمەڵایەتی و ئینسانی کورد دانا. لە دیدار و وتووێژی فەرمی لەگەڵ نوێنەرانی حیزب و کەسایەتییە سیاسییە بەشداربووەکان دا و هەروەتر بەڕێوەبەرانی شۆرای ئینتەرناسیۆنال سۆسیالیست، باسی لە زیادبوونی ئێعدام، گرتن و گوشارە ئەمنییەکان بۆ سەر خەڵکی کوردستان، پێشێلکردنی بەربڵاو و سیستماتیکی مافی مرۆڤ و بارودۆخی سەختی ژنانی کورد کرد و جەخت کرایەوە کە دەبێ پرسی کورد وەک بەشێکی دانەبڕاو لە هەر باسێکی جیددی سەبارەت بە دادپەروەری و دێموکراسی بخرێتە بەرنامەی کارەوە لە ڕۆژهەڵاتی ناوەڕاست. هەروەتر هەوڵێک درا بۆ جەختکردنەوە لەسەر ڕۆڵی سەرەکی ژنان له خۆڕاگری و ڕێکخستنی کۆمەڵایەتی له کوردستان تایبەتی لە شۆڕشی ژینا و وەبیرهێنانەوەی ئەو ڕاستییەی که شیکاری پرسه ناوچەیییەکان به بێ گرنگیدانی تایبەت به ڕەوشی ژنان، تەواو نابێت.
هاوکات لە چوارچێوەی دیدارەکاندا، لەگەڵ لایەنەکانی پارچەکانی تری کوردستانیش جەخت لەسەر پێویستی پتەوکردنی هەماهەنگی سیاسی و هاودەنگی زیاتر و پێکهێنانی گێڕانەوەی هاوبەش لە ئاستی نێودەوڵەتیدا کرایەوە. ئامانجی ئەم کارلێکانە بریتی بوو لە زیادکردنی قورسایی سیاسی کورد لە سیاسەتی ئورووپادا، دروستکردنی یەکگرتوویی زیاتر لە نێوان لایەنە کوردستانییەکان و دڵنیابوون لەوەی کە پرسی کوردستان بە شێوەیەکی پارچەپارچە و پەرتەوازە نەوروژێنرێت، بەڵکوو بە دەنگێکی یەکگرتوو لەسەر بنەمای پرەنسیپی هاوبەش باس بکرێت. ئەزمونی ئەم دیدارە دەریخست کە ڕۆڵێکی کارا و ڕێکخراوەیی کورد لە کۆڕ و کۆڕبەندە نێودەوڵەتییەکاندا بناغەییەو و دەتوانێ ڕێگە خۆش بکات بۆ ئەوەی پرسی کوردستان ببێتە بەشێکی بەردەوام لە کارنامەی پارتە پێشکەوتنخوازەکان لە سەرانسەری جیهاندا.
کۆمەڵەی زەحمەتکێشانی کوردستان لەسەر بنەمای ئەو ڕێبازە سیاسییە، بوونی خۆی لە ماڵتا وەک دەرفەتێک بینی بۆ تیشک خستنە سەر واقیعەکانی کوردستان و داکۆکی لە مافەکانی گەل و نەتەوەو و ژنانی کورد و هەروەها فراوانکردنی پەیوەندییە سیاسییەکان لەسەر ئاستی جیهانیی. ئێمە پێمان وایە بەرگریکردن لە دیموکراسی و دادپەروەری کۆمەڵایەتی بەبێ ئەوەی باس لە ئازار و بەرخۆدانی کورد بکرێت، ناتەواوە و دەبێت ئەم دەنگە شانبەشانی دەنگە پێشەنگەکانی دیکەی جیهان ببیسترێت. کۆمەڵە بەردەوام دەبێت لە پابەندبوون بە ڕێبازی دیپلۆماسی کارا و وتووێژ لەگەڵ لایەنە پێشکەوتنخوازەکان و بەدواداچوونی پرەنسیپی مافەکانی کورد لە هەموو ئاستەکاندا.
جێی ئاماژەیە هاورێیانی بەشدار بوو بریتی بوون لە فەریبا محەمەدی جێگری سکرتێر و ئارێز محەمەدی و سامان حوسین پەناهی کادری کۆمەڵە.
پەیوەندیەکانی دەرەوەی وڵات کۆمەڵەی زەحمەتکێشانی کوردستان
٣٠ی نوامبری ٢٠٢٥
