ڕاگەیاندنی کۆمیتەی ناوەندیی کۆمەڵە
بە بۆنەی ٢٥ی نۆڤەمبەرەوە
ئەمڕۆ لە ٢٥ی نۆڤەمبەر ڕۆژی جیهانیی هەوڵ بۆ نەهێشتنی توندوتیژی بەرامبەر بە ژناندا، دەنگی خۆمان بەرامبەر ئەو هەڵاواردنە چەند قاتەی لە سەر ژنانی کوردستان هەیە بەرز دەکەینەوە. توندوتیژیی پیاوسالارانە لە کۆمەڵگا و ماڵەکاندا و داگیرکەری و هەژاریی سەپاو بە سەر کۆمەڵگای کوردستاندا کە ئەو توندوتیژییە قووڵتر و نامرۆڤانەتر دەکات بە توندی سەرکۆنە دەکەین و هەموو هەوڵمان بۆ نەهێشتنیان دەخەینە گەڕ.
لە ڕوانگەی ئێمەوە توندوتیژی دژی ژنان ئاکامی ڕاستەوخۆی دەسەڵاتی باوک/پیاوسالارە. لە کوردستان دەسەڵات و بیرە دواکەوتووەکان، کولتووری جێکەوتوو بە ناوی پاراستنی شەرەف و دەسەڵاتی داگیرکەری کۆماری ئیسلامی و شێوەی دەسەڵاتدارەتییەکەی و کولتوورەکەیان، هەر هەموویان وەبەرهەمێ دەهێننەوە و درێژەی پێ دەدەن. هەر بۆیە لە ڕۆژهەڵاتی کوردستان باسی ڕزگاریی وڵات و دیموکراسی بە توندی گرێداوی ڕزگاریی ژنانن.
توندوتیژی بەرامبەر بە ژنانی کورد هەم ئەو کاتانەی لە ژێر ناوی پاراستنی شەرەف دەبێتە هۆی قەتڵی نامووسی و هەم ئەو کاتانەی دەسەڵاتداران دژی ژنانی خەباتکاری کورد بەکاری دەهێنن و تەنانەت ئەو کاتانە لە نێو ماڵەکاندا ڕوو دەدات، ئەو ڕاستییە دەسەلمێنێت کە دەسەڵات و بەشێک لە کۆمەڵگا، ژنان وەکوو تاکی سەربەخۆ و خاوەن بڕیار و ماف نابینن. خەبات دژی ئەو توندوتیژییە خەباتە دژی فاشیزم و هەڵاواردن لە هەموو ئاستەکانیدا.
بۆ کۆمەڵەی زەحمەتکێشانی کوردستان هەوڵ بۆ نەهێشتنی توندوتیژی بەرامبەر بە ژنان بەشێکی جیانەکراوەی خەباتی ڕزگاریخوازانە لە کوردستان و ئەرکەکانی حیزبێکی چەپی کوردستانییە. بۆ نەهێشتنی ئەو دیاردە دزێوە لە کۆمەڵگادا پێویستە کاری بەردەوام بۆ گۆڕینی ڕوانینی باوک/پیاوسالار بکرێت. هەروەها سێکسیزم کە ئەو ئایدیۆلۆژیا و بنەما کۆمەڵایەتییانە بەرهەم دەهێنێت و بەهێزیان دەکات کە ڕێگە بە توندوتیژی بەرامبەر بە ژنان دەدەن و تەنانەت خەڵک بۆ ئەو توندوتیژییە هان دەدا، دەبێت بنبڕ بکرێت. پێویستە هەموو ئەو یاسا دواکەوتووانە کە ڕێگە بە توندوتیژی دەدەن و ئەو سیستەمە ئابووری و کولتوورییەی ڕێگە لە ژنان دەگرێت خۆیان لە توندوتیژی ناو ماڵ دەرباز بکەن، بە قازانجی یەکسانیی ئینسانەکان بگۆڕدرێن. بە گشتی هەموو ئەو بیر و سیستەمە فیکری و کۆمەڵایەتی و سیاسی و ئابوورییە کە دەبنە بنەمای تیۆری و کردەوەیی درێژەی توندوتیژی بەرامبەر بە ژنان، دەبێت لە بنەڕەتەوە هەڵبتەکێنرێن و سیستەمێکی ئینسانی و یەکسانی جێگایان بگرێتەوە.
لەم ڕۆژەدا ڕێزی تایبەت و هاوپشتیی خۆمان ئاراستەی ئەو ژنە بوێرانە و ئەو ڕێکخراوە یەکسانیخوازانە کۆڵنەدەرانە دەکەین کە لە هەموو کوردستان لە دۆخێکی ئەستەمدا ڕۆژانە بەشداری خەبات دژی هەڕەشە و توندوتیژی بەرامبەر بە ژنانن، ئەوانەی سەرەڕای هەموو مەترسییەکان و نەبوونی پشتیوان و ئیمکانات خەباتی یەکسانیخوازانە بەرەو پێشەوە دەبەن، قارەمانەکانی ڕێگەی یەکسانی و ئازادین.
خەبات دژی پیاوسالاری، خەباتە بۆ دیموکراسی و کوردستانێکی ئازاد. ئێمە تا ئەو ڕۆژەی لە پارێزراو بوونی ژیان و ڕێزی ئینسانیی ژنان لە کۆمەڵگا و لە ماڵەکاندا دڵنیا نەبین، واز لە خەباتی یەکسانیخوازانە ناهێنین.
نەمێنێت توندوتیژی بەرامبەر بە ژنان
سەرکەوتوو بێ خەبات بۆ یەکسانی
ژن، ژیان، ئازادی
کومیتەی ناوەندیی
کۆمەڵەی زەحمەتکێشانی کوردستان
٢٤ی نۆڤەمبەر ٢٠٢٥